தகப்பனின் சொத்தில் பெண்களுக்கு ஏன் பங்கு இல்லை?

 09.01.2021

பதிவு செய்தவர் - ரஞ்சன், கங்கார் பூலாய், ஜொகூர்

தகப்பனின் சொத்தில் பெண்களுக்கு பங்கு கொடுக்க தேவை இல்லை என்று சொன்ன நம் முன்னோர்கள் ஒன்றும் முட்டாள்கள் இல்லை...

ஒரு வீட்டில் பிறந்த அண்ணன் - தம்பிகள் தந்தையின் சொத்தில் பாகம் பிரித்துக் கொள்வார்கள். அதன் பிறகு அவர்கள் பங்காளிகள் மட்டுமே. இவர் வீட்டு விசேஷத்திற்கு அவரும்; அவர் வீட்டு விசேஷத்திற்கு இவரும் போய் கலந்து கொள்வதோடு சரி.

மற்றபடி கொடுக்கல் வாங்கல்கள் எதுவாக இருந்தாலும் அது கணக்கில் வைக்கப்படும். பின் வசூலிக்கப்படும். சமயங்களில் வட்டியுடன்...

ஆனால் பெண்களுக்கு பாகம் எதுவும் கொடுப்பது இல்லை. மாறாகக் கல்யாணத்திற்குச் சீர் செய்வார்கள். நகை நட்டு பாத்திரம் பண்டம் வாகனம் ரொக்கம் என இந்தப் பட்டியல் நீளும்.

பாகம் பிரித்தால் கிடைக்கும் சொத்தின் மதிப்பை விட இந்த சீர் செனத்தியின் மதிப்பு அதிகமாக இருக்கும். அதோடு விடுவது இல்லை. சீமந்தம், பிள்ளை பேரு, பெயர் சூட்டுதல் தொடங்கி அந்தப் பெண்ணின் பிள்ளைகள் வளர்ந்து திருமணம் ஆகும் வரையில் தாய்மாமன் சீர் என்ற பெயரில் கொடுத்தே ஆக வேண்டும்.

அந்த உடன் பிறந்த சகோதரியின் மரணம் வரை உடன் பிறந்தவன் கூடவே வர வேண்டும்.

எல்லாவற்றையும் கணக்கு போட்டு பார்த்தால் பாகம் பிரித்து இருந்தால் போயிருக்க கூடிய சொத்தின் அளவை விட பன்மடங்கு போயிருக்கும்.

இதை எந்த ஆணும் கணக்குப் பண்ணி பார்த்து "இல்லை இல்லை... நான் எனக்கு கிடைத்த சொத்தின் அளவை விட கூடுதலாக உனக்கு கொடுத்து விட்டேன். இனிமேல் செய்ய முடியாது" என்று சொல்வது இல்லை.

இவன் கடன வாங்கியோ; தமக்கு கிடைத்த சொத்தை விற்றோ கூட தங்கையின் அக்காளின் நலனிற்காக அவர்களது தேவையைப் பூர்த்தி செய்வான்.

நியாயமாக வரதட்சிணைக்கு எதிராக போட வேண்டியவன் ஆண் தான்.   தந்தையின் சொத்தை பாகம் பிரிக்கையில் சகோதரிக்கும் ஒரு பாகத்தை கொடுத்துவிட்டு அதோடு நல்லது கெட்டதுக்கு நாம கலந்துக்குவோம்.

கொடுக்கல் வாங்கல் எதுவும் வேண்டாம். அப்படியே இருந்தாலும் அதைக் கணக்கில் வைத்து திரும்ப வாங்கிக் கொள்வோம் என்று நினைத்தால் அதன் பிறகு அவன் சம்பாதிக்கும் அனைத்துமே அவனுக்கே சொந்தம். ஆனால் எந்த ஆணும் அப்படி சிந்திப்பது இல்லை.

வேறு வீட்டில் வாழப் போகும் பெண்ணுக்கு கடைசி வரை பாதுகாப்பும், ஆதரவும் இருக்க வேண்டும் என்பதற்காகவே நம் முன்னோர்கள் ஏற்படுத்திய வழிதான் சீர் செனத்தி எல்லாம்.  

அப்படி பாகமாய் சொத்தைப் பிரித்து கொடுத்து விட்டுவிட்டால் அந்தப் பெண் ஆதரவற்று போவாள். இவனும் எனக்குத் தெரியாது என்று ஒதுங்கி விடுவான்.

அதற்கு வழி கொடுக்காமல் அந்த உறவைப் பிணைத்து வைக்கவே பெண்களுக்கு சொத்துக்களைப் பாகமாய் பிரித்து கொடுக்காமல் முதலீடாய் சகோதரனிடமே விட்டுவிட்டு கடைசி வரை கொஞ்சம் கொஞ்சமாய் வசூலிக்கும் வாய்ப்பை பெண்களுக்கு ஏற்படுத்தி கொடுத்தார்கள்.

பெண்களுக்கு சொத்துரிமை உண்டு என்று அரசு அறிவாளியாய் யோசித்து கொண்டு வந்த சட்டம் அந்த உறவை முறிக்கும் முட்டாள்தனம் என்பது உணராத பெண்கள் தான் சொத்தில் பங்கு எங்கள் உரிமை என்று போராட கிளம்புகிறார்கள்.  

எங்கோ ஒரு சகோதரன் ஒன்றும் செய்யாமல் ஏமாற்றி விட்டான் என்பதற்காக வழக்கு தொடுப்பவர்களைச் சொல்லவில்லை.

நீயும் அவன் கூட தான பொறந்த... உனக்கு மட்டும் சொத்துல உரிமை இல்லையான்னு உசுப்பி விடுற அரசோ - போராளிகளோ கடைசி வரை கூட வர மாட்டாங்க. உங்களுக்கு ஒண்ணுன்னா சகோதரன் தான் துடிப்பான். ஏன்னா அவன் தான் சக உதிரன்.

https://www.vikatan.com/arts/literature/138517-equal-ownership-for-women-in-home-property

ராதா பச்சையப்பன்:

இந்தக் கட்டுரை அருமை. தமிழ் நாட்டில் பிறந்த பெண்களுக்கு நீங்கள் சொன்னது சரியாக இருக்கும். தமிழ்நாட்டில்‌ ஒரு பெண்ணைத் திருமணம் செய்து வைத்து விட்டுப் பெற்றோர் படும் பாடு... பெரும் பாடுதான்.

அதிலும் அந்த வீட்டில் மேலும் ஒன்று அல்ல இரண்டு பெண்கள் இருந்தால் கேட்கவே வேண்டாம்.‌ சகோதரரே நீங்கள் சொல்வது அங்கு சரி. ஆனால் மலேசியாவில் அப்படி இல்லையே.

நீங்கள் சொல்வதும் போல், எந்தப் பெண்ணுக்கு எந்த அண்ணண், தம்பி செய்கிறார்கள். திருமணம், ஒரு குழந்தையோடு சரி... தாய் மாமன் சீர் என்பது நீங்கள் சொல்வது போல்‌ ஓர் அளவுதான் செய்கிறார்கள்.

எனக்கு தெரிந்த வரை, பெண்கள் நாங்களும், பிறந்த வீட்டின் பெயரையும் தற்காத்துக் கொண்டும், புகுந்த வீட்டிற்கும் செல்வாக்கும் மாறாது செயல் பட்டு வருகிறோம், வாழ்கிறோம்.

பாசமுள்ள‌ எந்த‌ச் சகோதரிகளும், உடன் பிறந்த சகோதரர்களுக்கும், எந்தச் சிரமமும் கொடுப்பது இல்லை. பிறந்த வீட்டையும் விட்டுக் கொடுக்காமல் வாழும் பெண்கள் இன்றும் நம்மிடையே இருந்து தான் வருகிறார்கள்.

புகுந்த வீட்டிற்குத் தெரியாமல், பிறந்த வீட்டிற்கு உதவுவதும் உண்டு. ஆனால் பெண்களுக்குத் தகப்பனார் சொத்தில் பங்கு இல்லை. பெண்கள் நாங்களும் கேட்பது இல்லையே!‌

பெண்கள் நாங்கள் பிறந்த வீட்டிலும், புகுந்த வீட்டிலும் எங்கள் ஆசா பாசங்களைத்  தியாகம் ‌செய்து தான் வாழ்கிறோம் சகோதரரே!    

ஆண்கள்  தாங்கள் திருமணம் செய்யும் பெண்களிடம் ’உன் அப்பா‌ சொத்து உனக்கு சேராது... வேண்டாம் என்று சொன்னவர்கள் எத்தனை பேர்கள்.

எந்தச் சகோதரர்களின் மனம் நோகும் படி இதைப் பதிவு செய்யவில்லை. நானும் ஒரு பெண்தான். சில பல பெண்களின் சார்பில்‌‌ பதிவு செய்தேன். என்றும் உங்கள் சகோதரி 🙏.

ரஞ்சன், கங்கார் பூலாய்:

உங்கள் ஆதங்கம் புரிகிறது. தமிழ் நாட்டிற்கான பதிவை ’மலேசியம்’ புலனத்தில் தவறுதலாகப் பதிவு செய்து விட்டேன்...